Ek se silsile hain :-|

Ek se silsile hain sab hijr ki rut bata gaee
phir wahi subah aayegi phir wahi shaam aa gaee

mere lahu mein jal uthe utne hi taaza dam chiraag
waqt ki saazishi hawa jitne diye bujha gaee

main bhi ba-paas-e-dostaan apne khilaaf ho gaya
ab yahi rasm-e-dosti mujhko bhi raas aa gaee

tund hawa ke jashn mein log gaye to thhey magar
tan se koi qabaa chhini sar se koi rida gaee

dil-zadagaan ke qaafile door nikal chuke tamaam
unn ki talaash mein nigaah ab jo gaee to kya gaee

aakhir-e-shab ki daastaan aur karein bhi kya bayaan
ek hi aah-e-sard thee saare diye bujha gaee.