Aiy Rabb-a-malayak-o-jin-o-bashar mian haazir hoon, main haazir hoon

Aiy Rabb-a-malayak-o-jin-o-bashar mian haazir hoon, main haazir hoon
Khidmat mein teri sharminda nazar, main haazir hoon, main haazir hoon

Jo Teri sanaa ke laaiq ho, ik lafz bhi aisa paas nahi
Kayaa taab-a-sukhan, kayaa arz-a-hunar, main haazir hoon, main haazir hoon

Qatray ki nigaah-a-hairaan par, dariyaa ki haqeeqat kese khulay
Main jaanta hoon ye baat magar, main haazir hoon, main haazir hoon

Mere chaar taraf hain, darwaazay, mera sarmaaya kuch andaazay
Mujhay be khabar ko bakhsh khabar, main haazir hoon, main haazir hoon

Ye arz-o-samaa ki pehnaaiee, ye meri adhoori beenaaiee
Hai shoq-a-safar hee zaad-a-safar, main haazir hoon main haazir hoon

Mere kaan teri aahaat se sajen, meri saans teri khushbu mein palen
Meri aankhen apne khaab se bhar, main haazir hoon mein haazir hoon

Aiy noor-a-azal, aiy husn-a-abad, Subhaan Allah, Subhaan Allah
Rahen roshan tere shams-o-qamar, main haazir hoon, main haazir hoon