Gungunaatay Huye Aanchal Ki Hawa Dey Mujh Ko

Gungunaatay Huye Aanchal Ki Hawa Dey Mujh Ko
Ungliyaan Phair Kay Balon Main Sula Dey Mujh Ko!

Jiss Tarah Faaltu Guldaan Paray Rehtay Hain
Apnay Ghar Kay Kisi Koney Say Laga Dey Mujh Ko!

Yaad Kar Kay Mujhay Takleef Hi Hoti Ho Gi
Eik Qissa Hoon Puraana Sa, Bhula Dey Mujh Ko!

Doubtay Doubtay Aawaz Teri Sun Jaaon
Akhri Baar Tuu Sahil Say Sadaa Dey Mujh Ko!

Main Tere Hijr Main Chup Chaap Na Mar Jaaon Kaheen
Main Hoon Saktay Mein, Kabhi Aa Kay Rula Dey Mujh Ko!

Dekh Main Ho Gaya Badnaam Kitaabon Ki Tarah
Meri Tash-Heer Na Kar, Ab To Jala Dey Mujh Ko!

Roothna Tera Meri Jaan Liye Jata Hai
Aisay Naraz Na Ho, Hans Kay Dikha Dey Mujh Ko!

Log Kehtay Hain Kay Yeh Ishq Nigal Jata Hai
Main Bhi Iss Ishq Main Aya Hoon, Dua Dey Mujh Ko!

Yehi Auqaat Hai Meri Teray Jeevan Mein Sadaa
Koi Kamzor Sa Lamha Hoon, Bhula Dey Mujh Ko!